مرور الرياض

من فترة كنت سايق في الرياض الصبح بدري...
من غرب الرياض رايح لوسطها...
الصناعية هناك... رايح أزبط شوية حاجات في العربية علشان رخصة السير بتاعتها منتهية وعايز أفحصها و أجدد الرخصة

حوالي الساعة 7:25 صباحا... يعني في عز زحمة الموظفين و المدارس بتاعت الصبح...

و فوسط الزحمة و في أزحم مكان شفته في الرياض في الساعة دي...
(طريق مكة "امتداد خريص" - بنفق التخصصي، متجه لميدان القاهرة)

بطلت العربية و مرضتش تنطق تاني،
قطعت كهرباء تماما. حتى مفيش كهربا تكفي أشغل الإنتظار...
و كمان الدنيا كانت بتمطر بقوة... مقدرش حتى أنزل أشوف فيها ايه!!!

هلاويس

مفيش عندي حاجة بتيجي على مرة وحدة كدا...

هما كانوا أربع مراحل

الأولى معاملة سيئة ("ليك عندي ايه؟")

و بعدين تصنيفي مع الشيشة و الأغاني في مجموعة واحدة

ما صدقت اني أقولها... كان الرد: "آه يا ريت"

الأخيرة بقا المعايرة "أنت الي دست و بعدين جاي تحاسبني!!!" فين الأصول الي اتكلمنا عليها؟

كان لازم أسيب الشغل...

و مش هشتغل في المجال دا تاني...

أنا أصلا بخاف منه و لما جربته بنفسي بقيت بخاف منه أكتر

صحيح كان حلو زي ما كل الناس بتقول

بس ختم بقرف زي ما أنا كنت دايما بقول

على ايه الحلاوة الي بتختم بقرف؟؟؟!!!!

يا عمي بلا قرف...

و دلوقت بعد إذنكم هروح أجيب إلي في بطني في أي مرحاض...

مين بيربي مين؟؟؟!!!!!

الناس هما الي بيربوا عيالهم....؟
و لا العيال هما الي بيربوا ناسهم....؟

لو بصيت حواليك هتلاقي أن الناس لما ربنا بيرزقهم بعيال...

سلوكهم بيتغير (بيتربوا) و بيقوا محافظين و حريصين أكثر
ورأيي أن دا بيحصل بسبب أن الواحد (المحترم، المسئول) لما بيكون حواليه أطفال بيكون وضعه مختلف، بيحاسب في كلامه وفي تصرفاته
علشان معروفة قوي أن الأطفال دول عبارة عن أجهزة تسجيل شديدة الحساسية... بتلقط منك كل شاردة وواردة (زي ما بيقولوا) سواء كلام أو تصرفات و تسجلها وتبدأ في إعادة عرضها فوراً...

و لو حضرتك مخدتش بالك من الحكاية دي قبل كدا وشفتها بعينك... أقولك أنا ازاي...

إنتخابات تانية ثانوي... كدا الهزار ولا بلاش

في تانية ثانوي...
صديقي الصدوق... الصفتي باشا

كان مدعوم من الإدارة... و عايزين يخلوه أمين الفصل
و كمان أمين مساعد المدرسة بعد كدا... بس مينفعش من غير ما يبقا أمين الفصل...

و حضر إنتخابات فصلنا الأخصائية الإجتماعية المسئولة عن تنظيم الإنتخابات شخصيا...
( ميس إيمان) و كانت الخطة أنهم يقنعوا الناس محدش يرشح نفسه قدامه علشان ياخدها بالتزكية
و أنا مبحبش كدا

صحيح هما مكانوش بيدعموه من فراغ...
(ما شاء الله كان الأول على المدرسة في آولى ثانوي) بس برضو أنا مبحبش كدا

سجلت اسمي

يوم جمعة...
إحدى الجمع
.

نمت بعد الفجر
و صحيت متأخر... بعد الآذان الأول للجمعة
.
قمت بسرعة
اتوضيت

.
الحمدلله بابا لسا هنا... علشان مش بنصلي في الجامع القريب
بنروح سوا نصلي عند الدكتور طارق الحواس
.
غيرت هدومي بسرعة
و نزلنا...

يا إلهي...
الجامع القريب بدأ الخطبة

.
الحمدلله السيارة لازالت طليقة (محدش قفل عليها)
ركبنا السيارة على عجل...
و انطلقنا نحث دورات المحرك للمسجد
.
وصلنا...
الدنيا هس هس
.
قلت لبابا: نزلني أنا...
نزلت وراح هوا يركن العربية
.
اتجهت لباب المسجد الخارجي أحث الخطى المرادي
دخلت...
هس هس
خلعت نعلي
دفعت الباب...
.
ما إن وضعت قدمي اليمنى بالداخل "بسم الله، اللهم افتح لي أبواب رحمتك"
حتى...
.
.
.
.
.
.
.
.
.
.
.
.
.

دوى صوت الدكتور طارق الحواس بالسماعات: "السلام عليكم و رحمة الله"
.الحمدلله سجلت اسمي

.

قال رسول الله صلى الله عليه وسلم :

"إذا كان يوم الجمعة ، كان على كل باب من أبواب المسجد الملائكة ، يكتبون الأول فالأول ، فإذا جلس الإمام طووا الصحف ، وجاؤوا يستمعون الذكر."

رواه البخاري

لازم تعدي السقف

السلام عليكم

دي أول تدوينة أكتبها...
بتشرح ما أعنيه بـ(فوق السقف) بالتفصيل... يمكن الممل شوية بس معلش استحملوني و أوعدكم الأسلوب هيتحسن بعد كدا إن شاء الله

بس طبعا دا هيحتاج لتعليقاتكم و نقدكم

فضيلة الشيخ الدكتور يوسف القرضاوي - حفظه الله - شيخ مصري تم منحه الجنسية القطرية...
مع أن من المعروف أنه من المستحيل الحصول على جنسية إحدى دول الخليج العربي...

ليه؟؟؟

المهم... اليومين دول في على فضيلته هجوم عنيف بسبب تحذيره من الغزو الشيعي للمجتمعات السنية الخالصة، و من ضمن الهجوم: مجموعة من المحامين الشيعة يرفعوا عليه دعوى قضائية من ضمن مطالبها سحب الجنسية القطرية...

تفتكروا هتستجيب ليهم السلطات القطرية؟؟؟؟
ولو حصل مظنش أن الشيخ القرضاوي هيهمه

الأزمة الي فيها فضيلة الشيخ القرضاوي حاليا أثارت في ذهني تساؤلات عن شخصيات تانية كتير و فكرتني بقصص كثيرة مشابهة:

فضيلة الشيخ محمد متولي الشعراوي - رحمه الله - كان بيدرس في الجامعة في السعودية و عرضوا عليه الجنسية السعودية المستحيلة -هوا رفضها-

في حين ناس بيتمنوها و مش قادرين ياخدوها...
برضو ليه؟؟؟

الشيخ عمر عبد الكافي - حفظه الله - قاعد في الإمارات منذ زمن - صحيح جنسيته مصرية - لكن معتقدش ان في حد هناك بيسأله جنسيتك ايه، وممكن يكونوعرضوا عليه الجنسية كمان

في الوقت الي فيه ناس أقصى أحلامها تأشيرة للإمارات...
يا ترى ليه؟؟؟؟

لأن كل دول عدو السقف...
ازاي يعني؟؟؟... سقف ايه؟؟!!!

أنا هقولكم...

لو افترضنا ان أي قاعدة في الدنيا (قوانين، عادات، تقاليد، قناعات أشخاص، سنن كونية) عبارة عن غرفة بتحجزك جواها (بتنطبق عليك)...
يعني جدران و سقف... والنور هناك

لو حضرتك قدرت تسمو و تعلو بنفسك لحد ما تخترق السقف دا و تبقا فوق مستواه، هيتنهي انطباق القاعدة دي عليك و هيكون بامكانك تروح أي مكان...

حتى سنن الله سبحانه و تعالى في كونه جعل لها سقف (بس طبعا مش أي حد يعديه)... مؤمنين بمعجزات الأنبياء، و سمعنا عن كرامات الأولياء

علشان كدا... لازم حضرتك مترضاش بأقل من أنك تعدي السقف و تبقا فوق المستوى، لازم تبقا شخص استثنائي

علشان متجيش بعد كدا تزعل و تستغرب الناس بتعمل معاك كدا ليه؟؟!!
ليه الدولة الفلانية مش عايزة تديني جنسيتها و بتعاملني كأجنبي منبوذ؟؟!!

طبعا كلنا دلوقت عرفنا ليه؟؟؟؟ علشان حضرتك معدتش السقف...

نختم بقا بمثالين لناس عدو السقف... يبان لنا منهم:
- أن الموضوع مش منحصر في مشايخنا الكرام أو في المجال الديني بس...
- و كمان مش منحصر في الناس المشاهير الي كل الناس تعرفهم

أولا مش محصور في الناس المشاهير دول... في ناس عادية محدش يعرفها زي:
د. عبد الرحيم (مصري)
دكتوراه في الطب النفسي، زوجته استشارية أمراض نساء، ابنه في الثانوية العامة من الخمسة الأوائل على البحرين، و بناته متفوقات ما شاء الله
منحوه الجنسية البحرينية هوا و أسرته...
ليه منحوه الجنسية؟؟؟

أظن احنا عارفين دلوقت (وبرأيي: البحرين هيا الكسبانة في العملية دي)


الدكتور فاروق الباز
شغل مناصب حساسة في الولايات المتحدة... و الرجل مسلم عربي!!!

في أمريكا يا جماعة!!!! بلد العنصرية... في البلد إلي أوشكت أن تمنع باراك أوباما من الترشح للرئاسة لمجرد أن أبوه كان مسلم بالاسم

طبعا السبب بقا معروف...

أكيد عمو الدكتور فوق السقف