مين بيربي مين؟؟؟!!!!!

الناس هما الي بيربوا عيالهم....؟
و لا العيال هما الي بيربوا ناسهم....؟

لو بصيت حواليك هتلاقي أن الناس لما ربنا بيرزقهم بعيال...

سلوكهم بيتغير (بيتربوا) و بيقوا محافظين و حريصين أكثر
ورأيي أن دا بيحصل بسبب أن الواحد (المحترم، المسئول) لما بيكون حواليه أطفال بيكون وضعه مختلف، بيحاسب في كلامه وفي تصرفاته
علشان معروفة قوي أن الأطفال دول عبارة عن أجهزة تسجيل شديدة الحساسية... بتلقط منك كل شاردة وواردة (زي ما بيقولوا) سواء كلام أو تصرفات و تسجلها وتبدأ في إعادة عرضها فوراً...

و لو حضرتك مخدتش بالك من الحكاية دي قبل كدا وشفتها بعينك... أقولك أنا ازاي...

في يوم من ذات الأيام... (حلوة من ذات الأيام دي)

كان العبدلله معاه ابن أخوه في العربية...
وقتها كان عنده حوالي 3 سنين... بدوووب بيعرف يتكلم... وبينطق نص الحروف غلط...ومش بيجيب جملة صح... :)

كنت بجيب حاجات وراجعين في أمان الله...
داخل على صينية (دوار) و بهدي...
جا واحد طاير من ورايا...
عداني من اليمين...
وراح كاسر عليا شمال جامد علشان يلف مع الصينية...
وصوت عجلاته طالع من كتر سرعته...
و الحمدلله كان هيشيلي وش العربية لولا ستر ربنا...

أنا بقا في وسط النرفزة دي...
و أنا بلم العربية بعد ما فاديته...
زعقت قلت غببببببي...

الواد مستناش...
عمو دا آآبي (غبي بس مش عارف ينطقها)؟؟
العبدلله بقا افتكر ان جنبه مسجل... بيسجل حتى الحاجات الصغيرة دي...
و عندي قاعدة... لا تستتفه دماغ طفل أبدا... فا دايما بكلم الأطفال على انهم ناس كبار عادي، فهموا بقا ولا مفهموش بس بيحسوا انهم حاجة مهمة، وحتى لو مفهموش خالص بيسجلوا وأسلوبهم يتحسن في الكلام...

رديت عليه قلتله لا يا مادا دا عمل تصرف غبي، أنا قلت غبي على التصرف، و طبعا في فرق لما أوصف واحد أنه غبي أو أنه عمل تصرف فيه غباء...

طبعا مفهمش حاجة و سكت :))))))))
مش عاملي فيها مسجل... خليه يسجل حاجة عدلة :)

الشاهد من القصة دي أنه شفتوا ازاي مركز معايا و بيسجلي كل كلمة؟؟؟
علشان كدا لما بيبقا حواليا أطفال ببقا ملبش وحاسب حساب كل نصف كلمة أو مجرد النية في أي تصرف
ومش العبدلله بس إلي بيعمل كدا... أي حد محترم بتكون دي طريقته :)

وهوا دا السبب الي بيخليني أقول و أكرر أن العيال هما الي بيربوا ناسهم... ولو معرفوش يربوهم، هيطلعوا هما كمان مش متربيين...

ولو عايزين نفهم الفكرة كويس خلونا نتفرج على النتايج في الحالتين...

الحالة الأولى: نشوف كدا حوالينا لما العيال بيقدروا يربوا ناسهم ايه الي بيحصل؟؟؟؟
والحالة التانية: نشوف لما الناس لو هما مش متربيين وفضلوا زي ماهما بعد ما يجيبوا العيال ايه الي بيحصل؟؟؟؟

الحالة الأولى:
ما شاء الله بنشوف كتير أطفال لسانهم و تصرفاتهم في منتهى النظافة و النقاء

تسأله ازيك؟؟ يقولك الحمدلله كويس بكل احترام و أدب...
تسأله اسمك ايه؟ يرد عليك بأدب أو ممكن يسكت...

زي: في عائلة أعرفها... ولادهم عرفوا يربوهم...
فا طلع الأولاد متربيين... ما شاء الله

أقوى كلمة عندهم: أنت فظيع... والحلو فيها...
أنهم بيقولوها طفولية (انت فزيع) وأنهم بيقولهوها في الحالتين (الفرح، والغضب)

يعني...
لو هزرت مع واحد فيهم و عجبه الهزار: هيضحك ويقولك انت فظيع
ولو رخمت على حد فيهم وتضايق واتنرفز منك: هيكشر و يقلب وشه ويقولك بنرفزة: أنت فظيع
يعني متقدرش تعتبرها شتيمة... ما هوا بيقولها في الحالتين سواء فرحان بيك ولا متنرفز منك...

في اللعب... لما بتخليه يعمل حاجة صعبة عليه... تلاقيه ما شاء الله اول ما بدأ بيقول بسم الله
لما بيقول هيعمل حاجة في المستقبل بيقول شالائه (ان شاء الله بس بالعيالي)... دلوقت اتحسنت بقت اشاء لاااه :)
لما بيدخل مكان بيقول عليكم السلام ورحمة الله... ما شاء الله :)
ربنا يحميهم يا رب

ولما تابعت الموقف... لقيت ما شاء الله
الأم و الأب منظفين لسانهم الأول...

الحاجات الإسلامية (السلام، تقديم المشيئة، التسمية) هما على طول بيستعملوها ولما حد من الأولاد بينسى بيفكروه
والأم لما حد من العيال بينرفزها مش بتشتمه ولا تطلق عليه صفات... اكتر حاجة ممكن تقولها (عايز تتربى)، أو (أنت فظيع) وبرضو بتقولها في الحالتين (الغضب، والفرح) مع تغيير النغمة و تعابير الوش...

أما الحالة التانية بقا:
الحالة التانية وما أدراك ما الحالة التانية

شفنا كتير عيال مش متربية ولسانهم أطول منهم بكتيييييييير من شتيمة و قذف محصنات و سب دين حتى

(أطفال شوارع - متسولين - الأطفال الموجودين في العشوائيات مع تجار المخدرات)

بس دول مش محور كلامنا... علشان دول ممكن تكون طولة لسانهم و بذاءة تصرفاتهم بسبب البيئة الي هما عايشين فيها مش بالضرورة بسبب ان هما معرفوش يربوا ناسهم...
دول بحكم وجودهم دايما في الشارع محتاجين يربوا الشارع كله... ودا مستحيل خصوصا في الأوساط الي بيتواجدوا فيها...

إلي بنتكلم عنهم... أطفال تلاقيهم كدا حلوين :)
شعر متسرح و توك و حركات
مستحميين
لابسين حلو
ومع دا كله...
.
.
.
.
.
برضو لسانهم أطول منهم...
بصراحة عندي مواقف كتير عن أطفال زي دول... بس ملقتش موقف أقدر أختم بيه أقوى من الي حصل مع كيشو كيلاني باشا و كان معاه السيد بسام بن عبده :)

و هسيبكم مع كيشو يحكيلكو الموقف بنفسه...

.................................................................. 
كتب كيشو:

والله عندك حق يا سراج باشا بيه يا ابن الأكابر ..... آه من العيال الي شكلها حلو دي

انا عندي مشكلة كبيرة مع أن في ناس كتير قوي ممكن يستغربوا ( مش مهم عندي طبعا ) المهم انا بعتبرها مشكلة عشان ديما بتسسببلي مشاكل كتير وديما اقول: انت الي جبتو لنفسك منت كنت قاعد محترم

المشكلة هيا أني بموت في البنات القمامير الصغيرين ومبقدرش أمسك نفسي لو شفت بنوتة صغيرة قمورة لازم ألعب معاها

المهم.................
يوم من الأيام... زي كل يوم راجع من الشغل مش شايف قدامي لقيت السيد بسام بن عبده بن عبدالخالق بيقولي وزي كل يوم بردو تعالى نقعد علي القهوة قلتله: ماشي يا باشا هاكل كده وأظبط وعدي عاليا ...

طبعا كالعادة جالي وانا لسه باكل :)

المهم نزلت معاه ورحنا علي قهوة سوق السيارات : (القهوة في مكان مفتوح كبير وحواليه سور بيمنع السيارات من الدخول)

يعني احسن مكان اي عيله تنزل فيه الاطفال يلعبو حولينهم

قعدنا وطلبنا ،،،،

ولقيت نفسي زي كل مرة بجري علي بنت صغيرة زي العسل ربنا يحفظها يارب كانت بتجري وتلعب حولين تربيزة أبوها وماماتها
وطبعا انا مبتعلمش.......... هي هي هي هي

الأول قعدت أبص عليها من بعيد لقيتها ماسكة الشيشة وحاطاها في بقها...
ناديت طبعا:... انتي يا حبيبتي غلط كده ،

ورحت ماسكها من ايدها وجايبها عندي علي التربيزة... وبقولها كده غلط... قالتلي: مهو بابا بيعمل كده... انت كداب ووحش
...............................(الي انت بتتكلم فيه اهو يا سراج باشا)
قولت خلاص بلاش أناقشها في الموضوع ده لأن انا في الأخر الي هخسر... لأن بكل بساطة باباها قاعد جنبنا ماسك الشيشة
فقولت انسيها الموضوع ده ............ ويارتني مفكرت أنسيها

بقولها اسمك ايه يا حبيبتي؟؟؟؟

وكانت هي ديه الغلطة الي بيبتدي بيها حاجات كتير الي في أخرها بقول .....

انا الي جبتو لنفسي منا كنت قاعد محترم :)
لقيتها بتقولي...
( انت مالك ومال أمك... ومال ابوك كمان )

طبعا بدورعلي السيد بسام بن عبده بن عبدالخالق لقيته واقع في الأرض من الضحك عليا...

وانا مش عارف المفروض أعمل ايه؟؟؟

أعرفها ان ده غلط؟؟؟؟ ( شوية تفكير )
لا بلاش لحسن تبهدلني أكتر

طب أعمل ايه؟؟؟؟
اضحك؟؟؟؟

هبقي ساهمت في تصرف غلط ممكن يتسجل (على رأي سراج باشا) عند البنت ديه طول عمرها
المصيبة ان مامتها وباباها ميتين على نفسهم من الضحك (ها ها ها ها ها ها)

حسيت ان الكام ثانية دول بيعدو عاليا سنين
وبعدين لقيت نفسي بقول نفس الكلمة الي بضطر أقولها

انا الي جبتو لنفسي منا كنت قاعد محترم :)
وأخيرا حسيت ان هرقل جي من بعيد ينقذ الراجل العجوز من الوحش الي هيموتو...

وطبعا ده كان الويتر الي بينزلنا الطلبات جي عشان ينزلنا الحاجة...

وساعتها بس لقيت باباها نده عليها عشان كانت هتوقع الحاجة من ايد الويتر ...

................ نفسي في مرة اكمل قعدتي وأطلع انام زي بقيت الناس ومقلش كلمتي المشهورة :(

انا الي جبتو لنفسي منا كنت قاعد محترم :)

ودلوقتي مافيش قدامي غير اني انده علي سراج باشا بيه ابن الأكابر عشان يضحك عليا شوية هو كمان هههههههههههه

يا باشا...... ياسراج باشا..... انت نمت ولا ايه!!!!

..................................................................

ههههههههههههههههههههههههه

لا نمت ايه... أنا هنا أهو

ولا تزعل يا عم كيشو أديني ضحكت عليك شوية أهو :))))))))))

ألف شكرا يا باشا... معلش تعبناك معانا...

و نورت المدونة يا كبير... :)

................

طبعا يا جماعة واضح جدا مين السبب...

أعتقد الصورة الظاهرة في القصة أفصح من أي كلام غيرها...

صورة البنت الي مش غالية على أبوها لدرجة أنه يتربى و يبطل يشيش قدامها...

ولا أمها الي بتضحك على البذاءة الي طالعة من لسانها...

حد بقا يعرف يجاوبني على السؤال...

.

.

يا ترى مين بيربي مين؟؟