إوعي الدوامة

كل بني آدم طبيعي... بتكون حياته عبارة عن مجموعة إيقاعات روتينية طبيعية...
بينها نقاط تحول... بعضها بسيط... وبعضها بتغير كل حاجة
بس في الأغلب النقاط دي بتكون بسبب حوادث بتحصل بتغير نظرتنا للحياة
وإتجاهنا فيها...
وقليل قوي لما الواحد بياخد قرار ويعمل نقطة التحول دي بنفسه

دايما بيكون في حاجات مهمة المفروض نعملها....
ولا أحسن أخلي الكلام عن نفسي
دايما بيكون في حاجات مهمة المفروض أعملها أو أحيانا (أبطل أعملها)
لكن بسبب الكسل أو (قلة الهمة والعزيمة) أو بسبب مشاغل الحياة
بلاقي نفسي وقعت في دوامات من التأجيل والتسويف
والمواعيد المميزة... أول السنة، أول الشهر، رمضان،،، وكلام من دا
-حد جرب الدوامات دي؟- أعتقد أنها مسابتش حد

الجزم في حياتنا

الجزم، الأحذية، الشووز... أو أي حاجة بتتلبس في القدم كمداس بكل الأسماء والأنواع...
دايما كانت رمز للإحتقار
بتستخدم كشتيمة... وبعض الناس لما بيجيبو سيرتها تلاقيهم بيضطروا يقولوا (لا مؤاخذة - أو أكرمكم الله)
وبالرغم من كدا مفيش واحد فقير أو غني، غلبان أو مقتدر... بيستغنى عن حاجة يلبسها في رجله

وحتى لو معندوش بيتمنى يبقى عنده...
أو بيتصرف...

قالك: "لا تبك"

"لا تبك على أي علاقة في الحياة، لأن الشخص الذي يستحق دموعك لن يدعك تبكي"

كأن الي قايل العبارة دي قايلها لواحد بيحب حد والتاني مطنشه، أو حد اتعرض لموقف متوقعش انه يجي من الي بيحبه، وهوا كل الي فـ ايده انه يبكي وهوا حابس نفسه في سجن من الحزن و الشجن.

ولكن...

مين بيربي مين؟؟؟!!!!!

الناس هما الي بيربوا عيالهم....؟
و لا العيال هما الي بيربوا ناسهم....؟

لو بصيت حواليك هتلاقي أن الناس لما ربنا بيرزقهم بعيال...

سلوكهم بيتغير (بيتربوا) و بيقوا محافظين و حريصين أكثر
ورأيي أن دا بيحصل بسبب أن الواحد (المحترم، المسئول) لما بيكون حواليه أطفال بيكون وضعه مختلف، بيحاسب في كلامه وفي تصرفاته
علشان معروفة قوي أن الأطفال دول عبارة عن أجهزة تسجيل شديدة الحساسية... بتلقط منك كل شاردة وواردة (زي ما بيقولوا) سواء كلام أو تصرفات و تسجلها وتبدأ في إعادة عرضها فوراً...

و لو حضرتك مخدتش بالك من الحكاية دي قبل كدا وشفتها بعينك... أقولك أنا ازاي...

لازم تعدي السقف

السلام عليكم

دي أول تدوينة أكتبها...
بتشرح ما أعنيه بـ(فوق السقف) بالتفصيل... يمكن الممل شوية بس معلش استحملوني و أوعدكم الأسلوب هيتحسن بعد كدا إن شاء الله

بس طبعا دا هيحتاج لتعليقاتكم و نقدكم

فضيلة الشيخ الدكتور يوسف القرضاوي - حفظه الله - شيخ مصري تم منحه الجنسية القطرية...
مع أن من المعروف أنه من المستحيل الحصول على جنسية إحدى دول الخليج العربي...

ليه؟؟؟

المهم... اليومين دول في على فضيلته هجوم عنيف بسبب تحذيره من الغزو الشيعي للمجتمعات السنية الخالصة، و من ضمن الهجوم: مجموعة من المحامين الشيعة يرفعوا عليه دعوى قضائية من ضمن مطالبها سحب الجنسية القطرية...

تفتكروا هتستجيب ليهم السلطات القطرية؟؟؟؟
ولو حصل مظنش أن الشيخ القرضاوي هيهمه

الأزمة الي فيها فضيلة الشيخ القرضاوي حاليا أثارت في ذهني تساؤلات عن شخصيات تانية كتير و فكرتني بقصص كثيرة مشابهة:

فضيلة الشيخ محمد متولي الشعراوي - رحمه الله - كان بيدرس في الجامعة في السعودية و عرضوا عليه الجنسية السعودية المستحيلة -هوا رفضها-

في حين ناس بيتمنوها و مش قادرين ياخدوها...
برضو ليه؟؟؟

الشيخ عمر عبد الكافي - حفظه الله - قاعد في الإمارات منذ زمن - صحيح جنسيته مصرية - لكن معتقدش ان في حد هناك بيسأله جنسيتك ايه، وممكن يكونوعرضوا عليه الجنسية كمان

في الوقت الي فيه ناس أقصى أحلامها تأشيرة للإمارات...
يا ترى ليه؟؟؟؟

لأن كل دول عدو السقف...
ازاي يعني؟؟؟... سقف ايه؟؟!!!

أنا هقولكم...

لو افترضنا ان أي قاعدة في الدنيا (قوانين، عادات، تقاليد، قناعات أشخاص، سنن كونية) عبارة عن غرفة بتحجزك جواها (بتنطبق عليك)...
يعني جدران و سقف... والنور هناك

لو حضرتك قدرت تسمو و تعلو بنفسك لحد ما تخترق السقف دا و تبقا فوق مستواه، هيتنهي انطباق القاعدة دي عليك و هيكون بامكانك تروح أي مكان...

حتى سنن الله سبحانه و تعالى في كونه جعل لها سقف (بس طبعا مش أي حد يعديه)... مؤمنين بمعجزات الأنبياء، و سمعنا عن كرامات الأولياء

علشان كدا... لازم حضرتك مترضاش بأقل من أنك تعدي السقف و تبقا فوق المستوى، لازم تبقا شخص استثنائي

علشان متجيش بعد كدا تزعل و تستغرب الناس بتعمل معاك كدا ليه؟؟!!
ليه الدولة الفلانية مش عايزة تديني جنسيتها و بتعاملني كأجنبي منبوذ؟؟!!

طبعا كلنا دلوقت عرفنا ليه؟؟؟؟ علشان حضرتك معدتش السقف...

نختم بقا بمثالين لناس عدو السقف... يبان لنا منهم:
- أن الموضوع مش منحصر في مشايخنا الكرام أو في المجال الديني بس...
- و كمان مش منحصر في الناس المشاهير الي كل الناس تعرفهم

أولا مش محصور في الناس المشاهير دول... في ناس عادية محدش يعرفها زي:
د. عبد الرحيم (مصري)
دكتوراه في الطب النفسي، زوجته استشارية أمراض نساء، ابنه في الثانوية العامة من الخمسة الأوائل على البحرين، و بناته متفوقات ما شاء الله
منحوه الجنسية البحرينية هوا و أسرته...
ليه منحوه الجنسية؟؟؟

أظن احنا عارفين دلوقت (وبرأيي: البحرين هيا الكسبانة في العملية دي)


الدكتور فاروق الباز
شغل مناصب حساسة في الولايات المتحدة... و الرجل مسلم عربي!!!

في أمريكا يا جماعة!!!! بلد العنصرية... في البلد إلي أوشكت أن تمنع باراك أوباما من الترشح للرئاسة لمجرد أن أبوه كان مسلم بالاسم

طبعا السبب بقا معروف...

أكيد عمو الدكتور فوق السقف