إنتخابات تانية ثانوي... كدا الهزار ولا بلاش

في تانية ثانوي...
صديقي الصدوق... الصفتي باشا

كان مدعوم من الإدارة... و عايزين يخلوه أمين الفصل
و كمان أمين مساعد المدرسة بعد كدا... بس مينفعش من غير ما يبقا أمين الفصل...

و حضر إنتخابات فصلنا الأخصائية الإجتماعية المسئولة عن تنظيم الإنتخابات شخصيا...
( ميس إيمان) و كانت الخطة أنهم يقنعوا الناس محدش يرشح نفسه قدامه علشان ياخدها بالتزكية
و أنا مبحبش كدا

صحيح هما مكانوش بيدعموه من فراغ...
(ما شاء الله كان الأول على المدرسة في آولى ثانوي) بس برضو أنا مبحبش كدا




كانت الإنتخابات في حصة اللغة الثانية (الألمانية)، هير (السيد) فؤاد
قلت أهزر معاه و مع الإدارة...
لم أرضخ لإغرائاتهم و ضغوطاتهم،،، ورشحت نفسي قدامه على أمانة الفصل

الصفتي باشا كان هيقتلني...
و ميس إيمان كانت هتقف على راسها... بس عمالة تطمئنه (لا تقلق لا تقلق)
كنت أرى الشرر يتطاير من أعينهما... هي هي هي

العبدلله بقا على الجانب الآخر بيفكر هيكسبه ازاي...
و واقف جنبي ابراهيم عبدالحليم(مش صديق... لكن كان أحد المؤيدين)

بدأت أتكلم مع الزملاء...
شايف عايزينه... شايف هير فؤاد شكله عامل ازاي... و الكلام جايب نتيجة بس مش قوي
انتهوا من توزيع أوراق الإقتراع... و هنا انفجرت القنبلة....
.
.
.

الأخ المدرس هير فؤاد أول ما جينا عند انتخاب الأمين انبرى قائلا: يلا كله يكتب مصطفى...
لا وكتب مصطفى على السبورة...

نط ابراهيم عبد الحليم ايه داااا؟؟؟
أنتو هتكتبوا زي ما بيقولكوا ولا إيييييه؟؟؟

و العبدلله نط على النص التاني من الفصل...
هما كمان هيقولولنا هنكتب مييين؟؟؟
اكتب محمد... اكتب محمد

تم التصويت...
أثناء فرز الأصوات...

الكل مترقب...

الصفتي باشا...بيرسل نظرات نارية مصدومة (تيجي ازاي احسبوها أنتو) علشان الحركة جت من العبدلله...
بس الحمدلله كانت متوزعة بيني و بين هير فؤاد

وأنا بحاول أكتم الضحك
.
.
.
.
.
.
.
.
.
اكتسحته طبعا... ههههههههههههههههههه
حصل الصفتي باشا ستة أصوات...
صوته...
وصوت بسام عبده
وصوت وسام عبده
دول قاعدين في الصف الي وراه

و صوت بسام جهاد
و الي جمب بسام جهاد
الصف الي ورا بسام و وسام


و صوت كمان مش فاكر مين...(بس من نفس المنطقة)
يعني من الآخر كدا الشلة بتاعتنا...بس أنا مكنتش لسا بقيت صديق ليهم

و العبدلله حصل على بقية الأصوات... (كانو 30 أعتقد)
احم احم
بعد إعلان نتيجة التصويت
خرجت ميس ايمان
و خرج وراها الصفتي باشا

الحتة الي جاية مش فاكرها كويس... مصطفى لما يشوفها ان شاء الله يبقا يعدل عليها...

بعد شوية... لا شويتين
رجع الفصل...
على وشه علامات الغضب
متكلمش معايا ولا كلمة برضو...

بعد ما الحصة خلصت:
لسا بيكلمني... و ايه الي أنت عملته داااا؟؟؟
قلتله يا عمي أنا بهزر معاك...
ابتسم ابتسامة خفيفة، قال:ماشي... طيب عايزك تيجي تتنازلي
العبدلله: يلا...

رحنا عند الأخصائية الإجتماعية
كتبت التنازل... وبقا الصفتي باشا أمين الفصل رسميا :)
و العبدلله بقا القائم بأعمال الأمين...يا عيني عليا :(


و الحمدلله الهوزاراية عدت على خير