مرور الرياض

من فترة كنت سايق في الرياض الصبح بدري...
من غرب الرياض رايح لوسطها...
الصناعية هناك... رايح أزبط شوية حاجات في العربية علشان رخصة السير بتاعتها منتهية وعايز أفحصها و أجدد الرخصة

حوالي الساعة 7:25 صباحا... يعني في عز زحمة الموظفين و المدارس بتاعت الصبح...

و فوسط الزحمة و في أزحم مكان شفته في الرياض في الساعة دي...
(طريق مكة "امتداد خريص" - بنفق التخصصي، متجه لميدان القاهرة)

بطلت العربية و مرضتش تنطق تاني،
قطعت كهرباء تماما. حتى مفيش كهربا تكفي أشغل الإنتظار...
و كمان الدنيا كانت بتمطر بقوة... مقدرش حتى أنزل أشوف فيها ايه!!!






اتصلت بأخويا... كان بيوصل أولاده المدرسة... قالي هوصلهم و أجيلك...
و طبعا علشان يوصلهم، وبعدين يدخل في الزحمة دي فيها مش أقل من ساعة...
صحيح مكنتش مستعجل... بس حرام الزحمة دي و كمان عربية عطلانة...
فكرت شوية... أكلم المرور يجولي؟؟؟
بس الرخصة منتهية وهيجي بتاع المرور يعملي كاني و ماني وأكيد هيعملي مخالفة...
خليني أستنى أخويا أحسن... أنا ورايا ايه؟!!
قعدت مستني شوية...
و ضميري ماسك في خناقي...
قاعد يأنبني...
عشان الي بيتزنقوا ورايا و بعدين يكتشفوا اني متعطل (الإنتظار مش شغال)
و يخرجوا من ورايا بطلوع الروح لما واحد يتكرم ويتفضل يسمحلهم يدخلوا قدامه... علشان الزحمة القاتلة...
مستحملتش تأنيب الضمير...
يوووووووووووووووووه طيب خلاص عرفنا إنه حرام عليا @:
قلت: هتصل بالمرور وإلي يحصل يحصل
طلعت الموبايل... تيت تيت توت 992
أول مرة أتصل بيهم... مش عارف هقول ايه...
رد عليا واحد: مرور الرياض، السلام عليكم..
العبدلله: وعليكم السلام... سيارتي متعطلة بنفق التخصصي فوسط الزحمة ومعطل السير...
ما فيها كهربا بالمرة، وأ...

قاطعني (كأنه بيقولي أنت هتحكيلي قصة!!!): وش نوع سيارتك؟
العبدلله: كابرس قديم... بيج لونه
الشخص الي رد: ما فيها كهربا؟ العبدلله: أيوا
الشخص: الإسم الكريم؟ العبدلله: محمد
الشخص: طيب يا محمد يايينك ألحين العبدلله: إيه دا؟ اللهجة قلبت إماراتي ليه!!! (في نفسي)... شكرا، مع السلامة

بصيت في الساعة كانت 7:45 صباحاً
قعدت مترقب...
عشر دقائق سمعت الصوت بيقرب...
بررررررررررر توْ توْ توْ توْ توْ برررررررررررر توْ توْ توْ توْ توْ توْ توْتوْ
دوريات المرور ليها صوت مميز كدا (هوا بصراحة ميتكتبش بس إلي انا كاتبه دا أقرب حاجة ليه)
بصيت في الساعة لقيتها 7:55 (ما شااااااء الله)


كمان بيبقا ليها صدمات كاوتش من قدام و محطوطة على حديدة مرنة يقدروا بزقوا بيها العربيات التانية من غير ما يخربوها (إلي باينة في الصورة)

وصل عندي وشافني كانت الساعة بقت 7:58 صباحاً
لقيته بيقولي في الميكروفون الخارجي: محمد... طفي السيارة و فظي...
(فضي يعني فك التعشيقة)
فكرت: افضحنا بقا :s طبعا العربية مطفية أصلا... جبت على النورمال و فكيت الهاند بريك و طلعت ايدي من الشباك فردتها الأول و بعدين ضميت أصابعي كلها عدا الإبهام لفوق (يعني كله تمام)...

كان ورايا هوا... قرب مني و بدأ في الدفع...
رخمة جدا السواقة لما يكون التسارع مش انت الي متحكم فيه...
و كمان الفرامل تعبانة علشان العربية مش شغالة :s
بس هوا خبرة الأخ ما شاء الله...
أولا على مهله خالص...
و كان مخلي باله بيسيبني في الوقت المناسب علشان ألحق أفرمل...
يعني كنت بطلع ايدي من الشباك أشاورله علشان يهدى عليا ألاقي أنه سايبني أصلا من قبلها بحبة
.....................  قبيل أول مخرج (لما بدأت الحارة الي برا الخط الأصفر)
اتكلم في الميكروفون تاني... قال: اطلع من المخرج إلي بيجيك... المخرج كان فاضي... كل الزحمة في الطريق الرئيسي...
دا لقيته بيزود السرعة... يعني وصلنا لأربعين تقريبا...
ولما وصلنا عند المخرج، وبدأت أدخل فيه... وصل السرعة لخمسين و مخرجش معايا... كمل هوا في الطريق الرئيسي

أنا فضلت ماشي على القصور الذاتي... طلعت في الخدمة و دخلت في شارع جانبي... ركنت على جنب...
اتصلت بأخويا قلتله ان المرور بعتولي دورية، وأنه طلعني من مخرج المؤتمرات، واني دخلت في أول شارع يمين و مستنيه هناك...
وإني مش هقدر أنزل أشوف لأن المطر لسا شغال...
قالي: طيب خلاص هجيلك على هناك إن شاء الله...

و الحمدلله جالي و اكتشفنا بعد الفحص والتمحيص ان الدينمو خرب و فضلت ماشي على البطارية لحد ما خلصت فا مبقاش في مورد كهربا يشغل العربية...
.......................................
:) دي تجربتي الأخيرة مع مرور الرياض...
ما شاء الله... جاهزين و بيعملوا شغلهم صح...
وأهم حاجة من غير تعقيدات...

يعني:
أولا... كلمتهم، خلال أقل من ربع ساعة كانت الدورية عندي...
و مش علشان خاطر عيوني... دا عشان العطلة إلي انا عاملها...

ثانيا... إلي جا معقدش الدنيا... عربيتي باين عليها انها قديمة و اللوحات قديمة...
و بحرف الألف، يعني في أول اللوحات القديمة...
يعني ببصة صغيرة و خصوصا من واحد بتاع مرور هياخد باله ان الرخصة 100% منتهية
بس هوا مش فاضي للتعقيد... شالني من الطريق... وراح يشوف بقية شغله :)
دا هيخليه هوا نفسه ميتعطلش لو في مشاكل تانية...
و أنا مش هخاف أكلمهم لو حصلي أي حاجة تانية في المستقبل لا سمح الله...
هيبقوا هما الخيار الأول...

غير طبعا اني استفدت...
كان أخويا هيخشلي ازاي في الزحمة دي؟؟
وازاي هنقف و نشوف العربية فيها ايه؟؟

مكانش ليها حل غير انه يجيلي ومعاه ونش يجرني لأي ورشة وياخدله 150 ريال ولا حاجة

لكن احنا شفناها في مكانها و جبنالها دينمو وركبناه و الحياة بقت فل :) (بعد ما المطر وقف طبعا)

شغلهم المزبوط دا ما شاء الله و البعد عن التعقيد و التناكة الفاضية من أهم الحاجات الي مخلية الرياض مرورها ماشي رغم ان في 2800000 (2.8 مليون) رخصة قيادة متسجلة في الرياض

طبعا الإمكانيات المادية بتفرق جامد... الدوريات في الرياض عددها كبير جدا منتشرة في كل حتى و مرور على أمن على جوازات... و كمان عربيات غالية
(باجيرو - لومينا زي الي في الصورة - كروان فكتوريا)
بس برضو مش هيا كل حاجة... الناس بيشتغلوا صح...
مش في النقطة الي حكيتها بس... في كل حاجة ما شاء الله
(تنظيم مرور، وتطبيق قوانين، وخطط سير، ومتابعة)

يعني مثلا كل الشوارع الرئيسية و المهمة في الرياض (زي طريق الملك فهد مثلاً) بيعملوا فيها زي ما مرور القاهرة بيعملوا في كوبري 6 أكتوبر لما بيكونوا متابعين الحركة ويعملوا زي اشارة على المطلع علشان الكوبري يسلك و بعدين يخلوهم يمشوا و الحركات دي...

وكمان كلهم عساكر مفهمش، ولا ضابط مع ذلك محدش بيقدر يرفع عينه فيهم (ماليين مركزهم) D:
و مش بالتناكة على الخلق... علشان محترمين نفسهم...

ربنا يكرمهم يا رب... ويزيدهم من فضله... ويرفع بقايا الظلم الموجودة بينهم...

ويحسن أوضاع جميع بلاد المسلمين...
وبالخصوص مصر حبيبتي :)
يا رب يكرمها و يكرم أهلها و زوارها و محبيها قادر يا كريم :)
.............................................................
يلا بعد إذنكم... أشوفكم المرة الجاية إن شاء الله :)
وطبعا عايز أعرف إيه رأيكم في الموضوع و القصة؟
وايه رأيكم في مرور الرياض؟
وازاي نقدر نطور نفسنا علشان نوصل لمستويات أعلى من إلي احنا فيها؟

ونعدي السقف بإذن الله :)

السلام عليكم...