طيران عادي ولا إقتصادي

السلام عليكم ورحمة الله وبركاته

بداية في سببين خلوني أكتب التدوينة دي

السبب الأول إني أول مرة أستخدم الطيران الاقتصادي

والسبب الثاني إني إتكعبلت في مشروع القراءة في المطارات

وطبعا لأن السبب الأول هوا الأساسي اخترته عنوان للتدوينة
ومع ذلك ترتيب الكلام هيكون سرد للأحداث بترتيب زمني ودا هيخليني أتكلم عن المشروع الأول








يوم السبت 12 ديسمبر 2009 وبعد مفاوضات عنيفة مع عدة أطراف

قدرت أسافر من مكة على الرياض علشان أحضر مؤتمر مطوري الخليج 2009 (GDC'09) إلي بتعمله مايكروسوفت كل كام سنة.

و يوم السبت برضو 19 ديسمبر 2009

قررت الرجوع لمكة عن طريق مطار جدة بس لأول مرة بطيران اقتصادي (طيران ناس) أو إلي بيقولو عليه طيران منخفض التكلفة

كل الي كنت أعرفه عن الفرق ان الأكل عندهم بفلوس... وبعض الناس تقولك الخدمة سيئة... وفي كلام عن المواعيد وأنهم بيتأخروا وكدا

المهم قلت أدينا بنجرب...
خرجت قبل ميعاد الطائرة -إلي كان في وسط اليوم- بأربع ساعات تحسبا لزحمة الرياض وطول المسافة (حوالي 50 كم) وعلى ما ألاقي تاكسي يوديني
على غير المتوقع... لقيت تاكسي قدامي أول ما خرجت على الشارع... ولم يبالغ في السعر... والطريق كان فعلا زحمة بس مش خانقة،
وصلت في ساعة يعني قبل الرحلة بثلاث ساعات في حين ان ساعة واحدة تكفيني...
رحت أخدت بطاقة صعود الطائرة واتجهت للبوابة إلي هتيجي عندها الطائرة (بعد ثلاث ساعات) وأنا شايل هم المدة الطويلة الي هنتظرها،
أول ما وصلت لصالة الإنتظار الي قدام البوابات شفت مكتبة!!!

استغربت شوية، بس كل إلي فكرت فيه أنها مكتبة من النوع إلي منتشر في كثير من أماكن الإنتظار إلي بتكون محتوياتها عبارة عن كتيبات إسلامية صغيرة، وبكون غالبا قرأتها قبل كدا، أو على الأقل عارف المعلومات إلي فيها
اقتربت منها لقيتها مكتبة فعلا فيها كتب بأحجام مختلفة ومواضيع شتى...

وكتب إنجليزية كمان...

ومطوية بتعرف بالمكتبة وسبب وجودها...

 بعد الإطلاع عليها فهمت أن في مشروع عاملاه مكتبة الملك عبدالعزيز العامة اسمه مشروع القراءة في المطارات... وهو جزء من مشروع أكبر اسمه المشروع الوطني لتجديد الصلة بالكتاب

المشروع عبارة عن مكتبة صغيرة يتوفر فيها مجموعة من الكتب المناسبة متاحة بين أيدي المسافرين عبر المطارات السعودية في الصالات الدولية والداخلية لإتاحة الفرصة لهم لممارسة نشاط القراءة مجاناً، والاستفادة من أوقات الإنتظار بما ينفع ويفيد...

وفعلا بدأو في المرحلة الأولى في مطار الملك خالد الدولي بالرياض في صالة المغادرة للرحلات الداخلية.

وكان في عدد من المطويات الأخرى إلي بتدعو للقراءة...

انتقيت لي كتيب حرصت ان حجمه يكون مناسب للوقت المتبقي ليا علشان لو بدأت في قراءة كتاب واضطريت اني اسيبه ممكن تجيلي جلطة أو يحصلي حاجة...

كان بيتكلم عن التكفير تاريخه وأسبابه وعلاجه بالإضافة إلى الأحكام الشرعية المتعلقة بيه... وفعلا خلصته وكان المسافرين بدأو يدخلو للطائرة...

رجعت الكتاب مكانه وأخذت شنطتي وانضممت للصف.

كدا المحور الأول للتدوينة انتهى... :)

-----------------------------------------------------------------

ونرجع للمحور الأساسي إلي بدأ بدخولي لطائرة تابعة لطيران ناس الإقتصادي...

الطائرة أيرباص A320 (تفاصيل أكثر بالإنجليزية (Airbus A320)...) نفس الطائرة إلي بتستخدمها الشركات العادية في الرحلات الداخلية...

لكن أول حاجة لفتت نظري وأنا لسا بخطو أول خطوة داخل الطائرة

مفيش درجة أولى...

الطبيعي... أول ما بتدخل الطائرة دي من الباب الأمامي بيكون على يسارك كرسيين قابليين للطي مثبتين في الحاجز الي بيفصل حجرة القيادة، للطاقم طبعا، وعلى يمينك فاصل بين الباب وبين مقاعد الدرجة الأولى...

تتقدم شوية يبقا على يسارك مدخل حجرة القيادة مغلق بباب، وعلى اليمين الممر المؤدي للمقاعد مغطى بستارة وأمامك مساحة صغيرة للخدمات، وفي مساحات أخرى للخدمات أكبر والحمامات في الآخر عند الباب الخلفي...

وبعد ما تمشي شوية في الممر تلاقي فاصل تاني يفصل الدرجة الأولى عن درجة الضيافة والفتحة الي فيه بتكون متغطية بستارة برضو.

أما هنا... فكان الكرسيين وحجرة القيادة أكيد موجودين...

والفاصل إلي على اليمين موجود بس فيه جزء زجاجي زي الباصات والمدخل بتاع الممر مش متغطي أصلا...

ومساحة الخدمات موجودة، والمساحة الي ورا والحمامات موجودين...

المدخل على يسار الصورة وتحجب الستارة الظاهرة حجرة القيادة

الأهم بقا ان بعد كدا في الممر مفيش أي حواجز أخرى، والكراسي كلها زي بعض لحد آخر الطائرة...

دخلت... مضيف واقف على الباب بيرحب بالمسافرين كالعادة، رديت التحية...
 انطباعي الأول كان جيد، المقاعد شكلها حلو واتساعها مناسب، مختلفة قليلاً
مثلا في طائرة الخطوط السعودية منطقة الرأس والرقبة بتكون أعلى من الظهر فيها زي مخدة كدا

مضيفة بترشد المسافرين لمقاعدهم (إالي مش محتاجة إرشاد لصغر الطائرة)

مديتلها ايدي بالملابس إلي على شماعات (جاكت البدلة إلى أنا لابسها وبدلة تانية)...

أخدتهم مني  اتجهت لمؤخرة الطائرة، حطيت شنطتي في الرف العلوي وقعدت...

الكرسي من ورا حلو، الجيب بتاعه بلاستيك مش قماش وعالي كدا في المتناول، ومحطوط فيه المنيو بتاع الأكل...

ممممـ أسعاره غالية بس مش فلكية...

والكيس الي حضراتكم كلكم عارفين وظيفته موجود...

يعني في المنيو بتاع الأكل... وفي الكيس بتاع عكس الأكل... كويس كويس

ايه ده... مفيش مجلة :(

لسا بفكر كدا... لقيت المضيفة راجعالي باللبس!!!

"Sorry, there's no place to hang these" أو كما قالت :).

ممممـ شايلين الدولاب الصغير إلي بيبقا ورا جنب الحمام!!! حاطين مكانه كراسي ولا إيه!!!

كنت قاعد جنب الشباك فا مستحيل أقوم خصوصا ان الناس لسا بيركبوا

والحمدلله اني كنت راجع واللبس أصلا كان مستعمل

كان لسا الرف مفتوح شاورت على شنطتي

"that's my bag, put them with it"... هيا بتكلمني انجليزي ليه؟!!!

راحت مكومة اللبس جنب الشنطة وقفلت الغطاء بتاع الرف، لأن اللبس كان هيقع.

---------------------

جا موعد الإقلاع... مفيش أي نوع من أنواع الشاشات...

صوت بيشرح في السماعات والمضيفة بتمثل ربط الحزام ونفخ سترة النجاة وأماكن مخارج الطواريء وأقنعة الأوكسجين لما بتنزل...

الأيرباص A320 إلي بتستخدمها شركات الطيران العادية بيكون فيها شاشتين مقاسهم 10 انشات تقريبا لكل صف مقاعد بينزلو من بين الأماكن الي فيها المكيف ولمبات القراءة وكدا

وحدة على اليمين و وحدة على اليسار أحيانا شاشة بظهر كل مقعد...

بعد انتهاء الطقوس الي بيعملوها كل مرة وربط الأحزمة والكلام دا، أقلعت الطائرة...

المفروض... المفروض يعني ان بعد دقائق قليلة من إقلاع الطائرة بتمر المضيفة بالجرائد

محصلش لأن مفيش جرائد...

هدأت الأوضاع، وبعد محاولات فاشلة للنوم وصلنا فوق المنطقة الجبلية إلي قبل جدة، وإلي كنت أول مرة أطير فوقها بليل...

لفت نظري تجمعات ضوئية على شكل بقع وسط الظلام، عجبني شكلها صورتها، أعتقد أنها قرى في وسط الجبال...

كان شكلها أحلى بكتير بالعين المجردة... كاميرات التليفونات بتتجنن من الظلمة...

دقايق وصلنا فوق جدة، وكنت برضو أول مرة أطير فوقها بليل...

شكلها مبهر... المدينة المضيئة...

برضو الصور مع سرعة الطائرة وإضائتها الداخلية الي عاملة الزجاج زي المراية

الصور مش زي الحقيقة خالص...

بعد كدا كله طبيعي... نورت لمبات ربط الأحزمة...

هبطت الطائرة، واتكلم الطيار بيهنينا بسلامة الوصول لمطار الملك عبد العزيز الدولي

ودرجة الحرارة الخارجية، ونزلنا من الطائرة ركبنا الأتوبيس ألي هودينا صالة القدوم...

دي مش ايدي على فكرة :)

........................................................

صحيح في فرق واضح في الخدمات، وبرأيي من ناحية العدد بس مش الجودة،،،

لكن في فرق بين النوعين من الطيران مش باين خالص خلال الرحلة،،،

الفروق الجوهرية والمهمة فعلا كلها خارج الطائرة...

أولا، الحجز والتذاكر: في الطيران الإقتصادي مفهوم الحجز مرتبط ارتباط كامل بشراء التذاكر... ونتيجة لدا:

- مفيش حجز انتظار مثلا، أو أي حجز بدون دفع.

- لا يمكن إلغاء الحجز ويمكن تغيير الموعد بمقابل مادي.

- لو أنت حاجز على رحلة وفاتتك راحت عليك التذكرة.

- بيع التذاكر بيكون على الإنترنت أو مكتب الشركة نفسها (بتكون في المكتب أغلى) علشان يتجنبوا دفع العمولات لوكلاء السفر.

أما بالنسبة للطيران العادي الحجز غير مرتبط بشراء التذاكر... لذلك الإجراءات مختلفة

بالنسبة للحجز:

- ممكن تحجز على أي رحلة حتى لو مليانة بتحجز انتظار.

- بيكون في مهلة لشراء التذاكر بتحددها الشركة وبتختلف على حسب قرب موعد الرحلة وكحد أقصى بتنتهي قبل الرحلة بـ24 ساعة.

- ممكن تلغي الحجز أو تغيره مجاناً لأنك لسا مدفعتش فلوس أساسا.

وبالنسبة للتذاكر:

- لو عندك حجز مؤكد على رحلة وفاتتك بتدفع غرامة تعليق.

- ولو عايز ترجع التذكرة وتاخد فلوسك بيخصموا جزء ويدوك الباقي.

- بيع التذاكر في أي مكان وأحينا وكلاء السفر بيكون عندهم عروض جيدة أفضل من شرائها من الشركة مباشرة.

ثانياً، المطارات: شركات الطيران الإقتصادي بتختار أقل المطارات تكلفة لرسوم الهبوط دا بيخليهم يبعدوا عن المطارات الرئيسية، يعني مثلا (لا يوجد طيران اقتصادي لمطار القاهرة)

وفي وسائل أخرى بتستخدمها الشركات لاقتصاد النفقات لا تمس المسافر زي:

- غالبا بيجيبوا نوع واحد من الطائرات علشان يقتصدوا في تكاليف التدريب والصيانة،،، وغالبا بتكون الأيرباص A320 أو بوينج 737 وبرضو تفاصيل أكثر بالإنجليزية Boeing 737

- إلغاء الكماليات (زي الشاشات وتجهيزات المقاعد) مش بس بيقلل ثمن شراء الطائرة، كمان بيخفف الوزن فا بيقل استهلاك الوقود.

- عدم تقديم الوجبات... برضو بيفرق في أماكن تخزين الطعام والوزن.

- الرحلات غالبا بتكون مباشرة علشان تكاليف الترانزيت.

- الطاقم بيروح ويرجع على طول علشان تكاليف الإقامة.

- بيحاولوا يشغلوا الشركة بأقل عدد من الموظفين.

وفي النهاية إلي عايز يستخدم الطيران الإقتصادي لازم يكون محدد... وكل ما يكون عارف موعد سفره بدري يكون أحسن علشان بتكون التذكرة أرخص.

والسلام عليكم ورحمة الله وبركاته :).